月份彙整五月 2011

撞火（上）　17/5/2011　王慧麟 【am730】響旺區遇到撞火A，走唔甩，俾佢捉了去飲咖啡，少不免炒蝦拆蟹，不斷批評小人，吹奏喇叭，鄰桌之中產家庭雞飛狗走。 撞火A係文化界人士，七月必定去書展擺檔。「早幾日，叫了手足去揀位，返到來嚇了我一跳，無奶油塞了我地去一個死位嘛！我梗係問點解。原來0個個預留俾中小型出版社的地區，靚位0個邊晨早俾人揀咗！喂！無理由吖！我0個個籌，大大話話頭幾位，全部好位俾人揀晒？下！」 撞火A食一啖油占多曰：「今年的中小型出版社專區，已經愈搬愈遠啦！大哥，搬遠咗，租金係咪應該有唔同呢？依家書展的租金，個個劃一，靚位同死位一樣價錢，有無搞錯呀！炒你個蝦蟹吖！」 我同撞火A話，第一，書展係貿發局搞的。貿發局唔係文化發展局，又唔係藝術推廣局，佢地無責任推廣文化，唔會以廉價租檔口，佢見錢開眼，你又點呢？難道杯葛乎？ 第二，書展係出版商一年一度散貨兼現金交收的最好時間。出版商唔使經發行，唔使經書局，唔會有拖數，直接面向讀者賣書收錢，現金交收，即時入帳，呢個係事實。你都知啦，如果唔係，你都唔會去擺檔。你要擺檔收水，又要人哋平租，無可能也。 撞火A聽完更扯火，炒我個蝦蟹。我笑說，不如將怒火，轉向支持競爭法，將貿發局納入監管，咁樣至可以拆散佢哋壟斷書展嘛！ 撞火（下）　24/5/2011　王慧麟 【am730】查實撞火A已經唔係第一次向書展開火。不過，係愛之深責之切而已。但似乎主辦單位係愈改愈善，定係愈改愈差呢？ 撞火A飲了一啖凍奶茶曰：「唔係話無改過，但有時有些做法好鬼谷氣。例如說，過去幾年，檔口都響年初畫好，大家有充足時間做準備。今年好唔對路喎，上個月尾至知道個場響邊度，大哥，都要充足的時間做嘢架，『卜』車都要早，你估叫車，一叫就有麼？」 撞火A質多啖油占多曰：「舊年真係離譜。主辦單位一個電話打來話，所有參展書商，要將貨車先去將軍澳齊齊等，然後再車去灣仔。唔係嘛，如果你個倉響灣仔，一樣都要將架車，車去將軍澳再車返來？咁唔環保？點解呢？問下點解，先頭話唔好影響交通，又話次次做展覽都係咁做。後來又改口話，警方叫咁樣做，唔關佢地事。你話啦，係唔係主辦有問題？」 我聽完佢撞火，笑笑口曰：「算把啦，咁撞火都無用。最大0個幾間書商，年年都去，檔口愈搞愈大，位置愈搞愈好，佢地唔出聲，你撞火都無用。但老實說，好多作者對你地行內的做法有微言架。貴寶號出名盡責，找數快，公公道道。但有等無良出版社，收錢就快，找數就慢，拖數就有，版稅就無。大哥，你吵了咁耐，點解好少作者群起齊撐小書商，有原因架，哈哈！飲啖茶先啦！」 作者為倫敦大學亞非研究學院法律系博士

看完村上春樹Long Interview的Short Story 17/2/2011　月巴氏 【am730】去年村上春樹跟季刊《思考的人》做的一個「Long Interview」，出版了。全書百幾頁，訪問做了足足三日。 撰文：月巴氏 blog：http://fatmoonba.blogspot.com/ email：fatmoonba@yahoo.com.hk 1994．《世間末日》．瀨野 0岩0岩在清晨時分以神速睇完這「本」訪談，又諗起好多「唔等使野」。 我看的第一本村上小說，是《世間末日與冷酷異境》。是嚴重瀨野的。 那一年是1994年，剛剛入中大。咁做得大學生嘛，即使明明沒有，也要裝出一點知性來。 村上春樹，細細個已經聽過呢個名。那一年，博益推出了《世》的中譯本（當時村上的香港中譯本統統由他們出版），而又離奇地在某本依然存在的八卦雜誌裡（不是你們想的那一本），看到有關這本書的短小介紹，心諗，係呢本嘞。當時我最鍾意睇的，其實是金庸和古龍。 《世》的形式，跟後來的《海邊的卡夫卡》和《1Q84》相似，是分別以兩個敘事角度進行故事，一個是「我」實際存在的世界，一個是「我」在腦裡開展的世界（唔知當年的我有沒有理解錯，而這麼多年來又沒有翻睇過－－OK，作為拎實本書在看的我，面對住書裡的兩個「我」，是的確睇到有點思覺失調的。 後來有同學問我借，我二話不說便借了給他。記得冇幾耐便把書還給我：「我頂唔順。」題外話，我和這位同學當年都很知性的，一齊去看那些很深的戲，一齊去報讀編劇班。 青春便在知性和扮野的一線之差溜走。 斬件書寫．都市．型吖 但我沒有放棄。當年中大的各個學會，「上莊」後例牌會在各canteen門外搞書展(不知道現在仲有冇呢樣咁知性的活動舉行)，書一律以折扣價發售。在聯合書院canteen外的一個書展，我便買了博益的《舞、舞、舞吧！》(台灣譯名是《舞．舞．舞》，但先入為主關係，咁多年我仲係會加個「吧」字和感嘆號)和時報的《聽風的歌》(那個系列叫「紅小說」，這個版本的《聽》還附有一個短篇《開往中國的Slow Boat》)。 對比《世》，我自覺今次沒有瀨野，但不瀨野，不代表睇得明，我指的是《舞、舞、舞吧！》。 《聽風的歌》倒是明晒的。因為這不過是主角「我」，在某個暑假和朋友「老鼠」的生活斬件式片段分享——我是真的迷上那種斬件式書寫手法，型之餘，也省事。當時心諗，如果lecturer准許我這麼樣寫論文，就正咯。所以，作為《聽風的歌》的續篇《1973年的彈珠玩具》，一樣採用斬件式書寫，一樣得到我的厚愛。還記得，我是在某個早上，匿在胡忠圖書館的「自閉位」（現在的同學還會咁樣叫嗎？）睇完這本書的。而那一天明明要考試，我是應該溫書的。 《聽風的歌》有篇附錄《都市的感受性》，評述村上小說的時代意義。我認識到原來我們活著的這個高度資本主義地方，可以被叫做「都市」，而 「都市」是可以去「感受」的。很型吖。 不hea答．冇用知性來壓人 畢業後我沒有見上200份工，好彩地見了3份，便總算有份工了。投身職場後明白到知性是不管用的。我不會跟同事討論村上，不會說自己正在睇甚麼小說，即使自己明明睇緊「文字書」，也會用一張冇用的A4紙包住封面。我不想別人知道我正在睇甚麼。後來意外間到了一個洋溢住「高壓知性」的地方工作，我才發現知性不是不管用，只是自己的那些所謂知性冇用而已。於是，我把自己裝得更加爛。別人在會上大談法國的高雅生活設計品味，我就專登講法國的暴力血殺電影是如何地與別不同…… Sorry，以上一段擺明離了題，讓我立即shift返去村上度。 我只想話，咁多年來keep住有睇村上的書，撇除那幾本遊記，統統睇晒了，當中有我不喜愛的（《人造衛星情人》、《海邊的卡夫卡》、《黑夜之後》），有我堅喜愛的（《尋羊冒險記》、《東京奇譚集》、《萊辛頓的幽靈》、《發條鳥年代記．預言鳥篇》、《1Q84》BOOK1和2的前半部），我不會說他是甚麼自己矢志不渝喜愛的作家，只會話：已經習慣了，總之一有他的書推出便會買和看。而在公眾地方看時，我依然會用一張冇用的A4紙包住。 可能冇一張紙俾我包得住銀幕和自己吧，所以一直冇去睇《挪威的森林》。 我啱啱以神速睇完那本用上三日兩夜的長訪談。自己的工作也不時要同人做訪問，明白到做訪問也可以是一件好難的事：問的要問得準確和好，這視乎問者本身有冇做好事前準備；答的要答得準確和好，而這又視乎答者交了幾多巴仙的「心」出來。 這次訪談，答者村上春樹不是hea答的，他真的答了一些有關自己創作心態和手法的變化、原因，而這又全靠松家仁之沒有hea問，兼問得到要領。看這一「本」訪談，好過去看那班甚麼文化人、評論家在懶知性地解讀村上。 還有，我喜愛村上沒有裝知性，也沒有用知性來壓人。